dimanche 3 août 2014

افكار غير تقليديه لهدايا الرجال


افكار غير تقليديه لهدااايا الرجال 
=================



الكاتب
: مي فتحي

نون دوت نت

لما باجي أشتري هدية لجوزي بقع في حيرة كبيرة لأني مش عايزة أجيبله هدية تقليدية مالهاش معنى، ولما بحاول أخرج برا دايرة التقليدية دي وأسأله: عايز ايه في عيد ميلادك يا حبيبي؟.. وهو بكل براءة بيرد: مافيش حاجة معينة في دماغي.

بس أنا ماسكتش.. وبعد بحث وتمحيص وشوية تفكير توصلت لكام حاجة مبتكرة ممكن ينفعوا كهدايا غير تقليدية للرجل.

- أولا بحاول أشوف ايه الحاجة اللي ناقصاه وبجيب له منها. سواء قمصان أو بنطلونات أو كوفيات في الشتا أو جواكت.. إلخ.


- كل ست بتبقى عارفة إن جوزها أو حبيبها نفسه في حاجة معينة اوي بس مأجلها. وفي الغالب الحاجة دي بتكون إلكترونية أو لها علاقة بالتكنولوجيا لأن الرجالة بتحب الحاجات دي جدا. ركزي معاه وشوفي هو بيتكلم عن ايه دايما وإنتي تقدري تشتريهوله. لاب توب، موبايل نوع معين، Mp3، كاميرا ديجتال.


- الرجالة فعلا زي الأطفال الصغيرين. مش هاتتخيلي قد ايه ممكن يتبسط لو كانت هديته بلاي ستيشن.

- الميداليات من الحاجات اللي الرجالة بيحبوها جدا. ممكن تهديه ميدالية فضة ولها تصميم حلو.

- السبح كمان بتعجب معظم الرجالة. اختاري سبحه بأحجار كريمة وقيمة.

- يمكن مانتوقعش الموضوع دا.. لكن الرجالة بيهتموا جدا بالكوتشيات والجزم الماركات. أهم حاجة تتأكدي من مقاسه 


- رتبي عشا و حطيله كارت غي جيبه مكتوب عليه دعوة لحضور عشاء رومانسي


- قدميله تذاكر سفر لرحلة تكوني حجزتيها لفردين

- احجزي له في Spa جلسة مساج . الموضوع دا هايفرق معاه جدا خصوصا لو بقاله فترة مأخدش أجازة أو مشغول ومُرهق.


- الأحزمة الجلد من الإكسسوارات المهمة جدا في لبس الراجل، نقي حزام قيم وبلون حيادي ومريح.


- الكتب طبعا هدية ممتازة جدا لو كان بيحب القراءة.


- لو ماكنش فيه مفر من الهدايا التقليدية زي العطور أو الكرافت أو الساعات أو المحافظ الجلد. حاولي على قد ما تقدري تكون الحاجة قيمة، تكوني متأكدة إنه هايستخدمها، لأن بعض الرجالة ما بيحبوش يلبسوا ساعة مثلا، تكون الحاجة من نوعه المفضل، أو لونه المفضل.


يمكن يكون جوزك/ حبيبك / أخوكي/ والدك مش عارف هو عايز ايه فعلا.. لكن لو بذلتي مجهود وحاولتي تخلي الهدية شخصية على قد ما تقدري أكيد هايتبسط بيها.

منقول من نون دوت نت


:اقرأي أيضا
(لفتح أكثر من موضوع اضغط زر كنترول مع الضغط على الروابط)

Aucun commentaire:

Enregistrer un commentaire